Сярэднявечная штодзённасць у Беларуси гісторыка-філасофская рэканструкцыя

Abstract

Тая першасная аснова, на якую накладваліся ўсе пазнейшыя інтэлектуальныя уплывы, – гэта традыцыйная, ці архаічная, культура, базавыя светапоглядныя параметры якой забяспечвала сістэма звычаёвага права, ці так званы комплекс праўд, прывязаны да пэўных этнічных структур. Узнікшая на шляху дэсакралізацыі міфалагічнай свядомасці, традыцыйная культура будавала сваю светапоглядную парадыгму не праз характэрныя для рэлігіі і міфалогіі ўзаемаадносіны зямнога i нябеснага, але праз своеасаблівую разметку штодзённасці. Архаічная свядомасць заснавана на вельмі выразнай разгортцы чалавечых патэнцый ад цэнтра свету – дому – праз блізкі свет суседскай абшчыны да свету далёкага, які ўключае ў сябе ўвесь свет – спазнаны i неспазнаны.