Вербальнае выражэнне камічнага ў трагікамедыі Янкі Купалы “Тутэйшыя”

Abstract

Для стварэння камічнага эфекту ў трагікамедыі Янкі Купалы “Тутэйшыя” выкарыстоўваюцца розныя вербальныя сродкі - тыповыя, для якіх камічная функцыя з'яўляецца асноўнай (каламбуры - паранамазійныя / фразеалагічныя, іранізмы), і нетыповыя, для якіх гэтая функцыя другасная (метафары, параўнанні, эпітэты, акоомараны, сінонімы, антрапонімы, фразеалагізмы, парэміі, лексічныя аказіяналізмы, іншамоўныя ўкрапіны і інш ). Камічную афарбоўку надаюць маўленню такія яго якасці, як шматслоўнасць (зніжае інфармацыйнасць выказвання, робіць яго неакрэсленым) і штучнасць (ненатуральнасць). У выяўленні камічнай экспрэсіі важная роля належыць вербальным актуалізатарам (прэ- і постпазіцыйным) - сродкам, якія сведчаць пра наяўнасць камічнага адцення ў моўнай адзінцы (слове, фразеалагізме). Камічны эфект узмацняецца з дапамогай інтэнсіфікатараў (экспрэсіўна маркіраваных слоў, канцэнтраванага або парцэляванага ўжывання моўных адзінак).